ARDHI ZISIZOENDELEZWAKUREJESHWA SERIKALINI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

SERIKALI imeagiza kurejeshwa ardhi ambayo haiendelezwi na kuwapa  wananchi wanaokabiliwa na uhaba wa ardhi katika maeneo mengi hususani  mkoani Tanga.

Wito huo ulitolewa na Waziri Mkuu, Mizengo Pinda, alipokuwa akifunga maadhimisho ya 10 ya Wiki ya Serikali za Mitaa yaliyofanyika kitaifa katika viwanja vya Tangamano, jijini hapa.

Pinda alitoa agizo hilo kutokana na baadhi ya watu kuhodhi maeneo makubwa ya ardhi mkoani hapa bila kuyaendeleza huku Watanzania wengine wakiishi bila umiliki wa ardhi, hali inayosababisha ugumu wa maisha.

Alisema ni wakati wa kurejesha serikalini ardhi ambayo haiendelezwi kwa ajili ya shughuli za kimaendeleo badala ya kukaa bila shughuli yeyote.

“Tunatambua serikali ina migogoro mingi ya ardhi, hivyo maeneo yote ambayo hayaendelezwi tupewe orodha, ili apelekewe Rais Kikwete aweze kuyatolea maamuzi na hatimaye wagaiwe Watanzania,” alisema Pinda.

Awali, Mwaenyekiti wa Jumuiya ya Tawala za Mitaa Tanzania (ALAT) Taifa, Dk. Didas Masaburi, aliiiomba serikali kukubali kupitisha sera ya kukuza uchumi katika ngazi ya halmashauri, kuongeza ajira kwa vijana na wanawake sambamba na kukuza uchumi wa mtu mmojammoja pamoja na kuingizwa kwa sura kamili ya serikali za mitaa katika mchakato wa kupata katiba mpya.

Alisema ni vema sasa katika mchakato wa katiba mpya ikatambua uwepo wa Serikali za Mitaa, kwani bila Serikali za Mitaa hakuna maendeleo endelevu hususani katika suala zima la kuwaletea wananchi maendeleo

Chanzo;Tanzani Daima