HUKUMU YA KESI YA VIGOGO KINONDONI YAHAIRISHWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

HUKUMU ya kesi namba 38/2013 inayomkabili Mweka Hazina wa Kinondoni, Alfred Mlowe na wenzake 12 iliyotarajiwa kutolewa jana katika Mahakama ya Hakimu Mkazi Mkoa wa Tanga, imeahirishwa hadi Julai 24 mwaka huu baada ya mmoja wa watuhumiwa kushindwa kufika mahakamani.

Kabla ya kuahirishwa kwa hukumu ya kesi hiyo, Hakimu Maira Kasonde alibaini kutokuwapo mahakamani kwa mtuhumiwa Allen Meena na kumtaka mdhamini aeleze sababu ya mtuhumiwa huyo kutokuwapo mahakamani.

Mdhamini wa Meena, alimueleza Hakimu Kasonde kuwa mtuhumiwa huyo ameshindwa kufika mahakamani kutokana na kusumbuliwa na presha na malaria.

Kutokana na hali hiyo, Hakimu Kasonde alimtaka mdhamini huyo kuhakikisha tarehe nyingine itakayopangwa mtuhumiwa anahudhuria mahakamani.

Watuhumiwa wengine katika kesi hiyo ni Rickson Lema, Rehema Kajembe, Lusungu Masangula, Dk. Clement  Shembilu, Alfa  Moshi, Ally Mkongelwa, Halima  Kaima, Ahmad  Shemu, Ramadhani Mzonge na Primi    Mamseri.

Watuhumiwa hao wanadaiwa kati ya Desemba Mosi na 29, mwaka juzi walitumia madaraka yao vibaya na kumpatia kazi ya ujenzi wa barabara ya Raskazoni, Mkandarasi Y.N Investment ambaye hakuwa na sifa.

Upande wa mlalamikaji ambao ni Taasisi ya Kuzuia na Kupambana na Rushwa (Takukuru) walidai utoaji wa zabuni kwa kampuni hiyo ilikuwa ni kinyume na kifungu 80(5) cha kanuni ya manunuzi ya umma kutokana na zabuni kutangazwa mara moja.

Katika utetezi wao, washitakiwa hao wakiongozwa na wakili wao, Mwita Waissaka, walikana kutoa zabuni hiyo kinyume cha taratibu.

Chanzo;Tanzania Daima