HUKUMU KESI YA MWEKA HAZINA KINONDONI JULAI 24

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

MAHAKAMA ya Hakimu Mkazi Mkoa wa Tanga, imeahirisha hukumu ya kesi namba 38/2013 inayomkabili Mweka Hazina wa Manispaa ya Kinondoni, Dar es Salaam, Alfred Mlowe na wenzake 12 hadi Julai 24, mwaka huu, kutokana na mmoja wa washitakiwa kushindwa kufika mahakamani.

Kwa sasa Mlowe ni Mweka Hazina wa Manispaa ya Kinondoni, huku washitakiwa wengine katika kesi hiyo wakiwa wameshastaafu utumishi wa umma na wengine kuhamishwa katika halmashauri mbalimbali nchini pamoja na baadhi yao kubaki mkoani Tanga.

Kabla ya kuahirishwa kwa hukumu ya kesi hiyo, Hakimu Maira Kasonde alibaini kutokuwapo mahakamani kwa mtuhimiwa, Allen Meena na kumtaka mdhamini aeleze sababu ya mtuhumiwa huyo kutokuwapo.

Mdhamini wa Meena, alimueleza Hakimu Kasonde kuwa mtuhumiwa huyo ameshindwa kufika mahakamani kutokana na kusumbuliwa na presha na malaria.

Kutokana na hali hiyo, Hakimu Kasonde alimtaka mdhamini huyo kuhakikisha tarehe nyingine itakayopangwa mtuhumiwa anahudhuria mahakamani.

Watuhumiwa wengine katika kesi hiyo ni Rickson Lema, Rehema Kajembe, Lusungu Masangula, Dk. Clement  Shembilu, Alfa  Moshi, Ally Mkongelwa, Halima  Kaima, Ahmad  Shemu, Ramadhani Mzonge na Primi    Mamseri.

Watuhumiwa hao wanadaiwa kati ya Desemba Mosi na 29, mwaka juzi walitumia madaraka yao vibaya na kumpatia kazi ya ujenzi wa barabara ya Raskazoni, Mkandarasi Y.N Investment ambaye hakuwa na sifa.

Upande wa mlalamikaji ambao ni Taasisi ya Kuzuia na Kupambana na Rushwa (TAKUKURU) walidai utoaji wa zabuni kwa kampuni hiyo ilikuwa ni kinyume na kifungu 80(5) cha kanuni ya manunuzi ya umma kutokana na zabuni kutangazwa mara moja.

Katika habari iliyochapishwa toleo Na 3491 na 3492, ilitafsirika visivyo, na hivyo kuonekana kama washitakiwa wote ni watumishi wa Manispaa ya Kinondoni kwa sasa. Tunaomba radhi kwa usumbufu uliojitokeza.

Chanzo:Tanznia Daima