WAZAZI TANGA WAPEWA USHAURI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
WAZAZI wametakiwa kufuatilia maendeleo ya watoto wao shuleni ikiwa ni pamoja na kushirikiana na walimu ili kuweza kuthibiti utoro.
Akizungumza juzi wakati wa uzinduzi wa kitabu cha Haki na Ulinzi wa Mtoto kwa klabu za wanafunzi shuleni kilichochapishwa na Shirika la Passadit, Katibu Tawala Wilaya ya Tanga, Bernard Marselline, alisema Mkoa huo unakabiliwa na tatizo la utoro hatua inayochangia kushuka kwa kiwango cha elimu.
Marselline, alisema kuna aliwataka walimu kuhakikisha wanatoa taarifa juu ya vitendo vya utoro na mimba shuleni na iwapo watashindwa kuripoti matukio hayo hatua za kinidhamu zitachukuliwa kwa walimu hao.
Katibu huyo aliwakemea wazazi hao kuacha kuwaoza mabinti zao wakati wakiwa shuleni na badala yake kusimamia kwa ukaribu maendeleo yao ili wafanye vema katika masomo yao.
Naye Mratibu wa Shirika la Passadit, Simon Stephano, alisema shirika lake kwa miaka mingi limekuwa likifanya utafiti mitaani na kubaini ukatili wa kijinsia kwa watoto ukiendelea.
Alisema wamechapa kitabu hicho ili kuwawezesha jamii ya watoto kuelewa haki zao hivyo kitabu hicho kitatoa muongozo hatua itakayosaidia kutokomeza vitendo vya unyanyasaji vinavyofanyika katika jamii.
Chanzo:Tanzania Daima 

MOTO WATEKETEZA MADUKA TANGA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
MADUKA manne yameteketea kwa moto kutokana na hitilafu ya umeme barabara ya 14 jirani na stendi ya mabasi yaendayo mikoani jijini Tanga, usiku wa kuamkia jana.
Moto huo uliozuka majira ya saa tatu na nusu usiku katika eneo hilo, inaelezwa chanzo cha moto huo ni hitilafu ya umeme iliyosababishwa na kutokuzimwa kwa baadhi ya vifaa.
Bakari Shabani ambaye ni shuhuda wa tukio hilo, alisema alishangaa kuona moshi ukitoka juu ya mlango wa duka moja linalouza vifaa vya umeme ndipo alipowaambia wenzake ili kutoa taarifa kwa Jeshi la Zimamoto.
“Mimi nilikuwa katika biashara yangu ya chipsi jirani kabisa na maduka haya, mara ghafla nikashangaa kuona moshi ukitokea kwa juu… si ndipo nilipopiga kelele ili watu waje,” alisema Shabani.
Alisema kuwa Zimamoto walifika katika tukio na kuanza taratibu za uokoaji ingawaje hawakufanikiwa kwa kiasi kikubwa, kwani tayari vitu vilivyokuwemo vilikuwa vimeshateketea.
Akizungumza na Tanzania Daima, Kaimu Kamanda wa Jeshi la Zimamoto na Uokoaji Mkoa wa Tanga, Charo Mangare, alisema kuwa ni vema wafanyabiashara kufunga mitungi ya kuzimia moto ‘Fire extinguisher’ ili kutatua matatizo ambayo yanaweza kutokea katika majanga hayo ya moto.
Kwa upande wake, Kaimu Kamanda wa Polisi Mkoa wa Tanga, Juma Ndaki, alithibitisha kutokea kwa tukio hilo na uchunguzi wa kubaini chanzo cha moto huo unaendelea
Chanzo; Tanzania Daima 

MRADI WA SECAP LUSHOTO HATARINI KUTOWEKA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 
MRADI wa Hifadhi ya Mmomonyoko wa Udongo na Kilimo ijulikanayo kama ‘Soil Erosion Control and Agroforest Project (SECAP), unaojumuisha vijiji saba vya Mlalo na Lushoto uko kwenye hatari ya kutoweka endapo hatua za haraka kuunusuru hazitachukuliwa.
Mradi huo ulianzishwa mwaka 1980 na ulikuwa na malengo ya kuhifadhi vyanzo vya maji, kuendesha kilimo cha kisasa na kupanda miti, ambako ulilenga eneo la maili 610 hadi 2300 kwa kuwashirikisha wananchi zaidi.
Imedaiwa kuwa, wafanyabiashara wanaovuna miti katika hifadhi za miti za mradi huo hutoa kiasi cha sh 500,000 hadi sh milioni 1 kwa baadhi ya viongozi, kuhakikisha wanawalinda na mbao zao kwa madai walishaweka mambo sawa kwa baadhi ya wajumbe wa kamati ya uvunaji Wilaya ya Lushoto.
Mkurugenzi wa Halimashauri ya Wilaya ya Lushoto, Jumanne Shauri, Mwenyekiti wa Halimashauri hiyo, Lucas Shendolwa na Mbunge Henry Shekifu, wameahidi kuchukua hatua za haraka kuzuia uharibifu huo wa mazingira kuendelea walipozingumza na Mwandishi wa habari hizi kwa njia ya simu kwa nyakati tofauti.
Tanzania daima ilipotembelea vijiji hivyo, ambavyo ni Hemtoye, Msale, Kifulio, Makole, Kwekanga, Kihifu na Kigulunde, ilishuhudia wafanyabiashara zaidi 15 wakikata miti katika msitu huo.
Uchunguzi umeonyesha kuwa, wafanyabiashara hao waliomba vibali vya kukata miti aina ya ‘Kaltas’ kwa maelezo kuwa imekuwa ikitumia maji mengi ardhini, jambo ambalo limetoa upenyo kukata miti ya mivule na mingineyo na hakuna mapato yanayonufaisha vijiji husika.
Mkuu wa wilaya hiyo, Majid Mwanga, alisema kuwa yeye kama mwenyekiti wa kamati ya uvunaji wilaya, amekuwa akitoa vibali vya uvunaji miti baada ya kupata taarifa kutoka ngazi za vijiji na Idara ya maliasili na kwamba, mtu anapokiuka ni vema watendaji na wananchi wampe taarifa.
“Mimi niko hapa ofisini sijui nini kinatokea msituni huko…nawaomba wananchi wenye mapenzi mema kama nyinyi waandishi, mtupatie taarifa na kama wabovu ni maliasili, viongozi wa vijiji, kata au idara ya misitu… tutachukua hatua kama serikali,” alisema.
 Chanzo;Tanzania Daima

WAHITIMU JKT WATAKIWA KUZINGATIA UTII

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 

JESHI la Kujenga Taifa (JKT), limewataka wahitimu wa mafunzo ya awali kuzingatia utii na uwajibikaji katika jamii wanazoishi ili kuepuka migogoro.
Aidha, kupitia mafunzo waliyoyapata yasiwe kwa faida yao pekee bali kwa jamii nzima.
Wito huo umetolewa jana na Kanali Ferix Samillan, wakati wa ufungaji wa awali wa kundi la tatu la miaka 50 ya JKT kwa vijana waliomaliza kidato cha sita.
Kanali Samillan, alisema kuwa ni jukumu lao kuwalea vijana wa kitanzania, na kwamba vijana hao wamemaliza mafunzo yao ya awali takribani miezi mitatu, hivyo wako tayari kulitumikia Taifa lao huku wakiwa na uadilifu.
“Pia nawaasa kutokujiingiza katika makundi ambayo yanataka kuigawa nchi yetu, zingatieni uzalendo… Tanzania ni nchi yetu na hakuna ambaye ataipenda zaidi ya sisi wenyewe,” alisema KanaliSamillan.
Naye Mkuu wa Wilaya ya Korogwe, Mrisho Gambo, ameitaka serikali kuandaa mpango maalumu kwa vijana hao ambao wamemaliza mafunzo, kwa kuwaandalia kitu ambacho kitawasaidia katika maisha yao baada ya kuhitimu.
Alisema kupitia mafunzo hayo, vijana hao watakuwa ni wa kipekee katika jamii zao hasa kwa wale wanaoona mafunzo haya hayana maana, kwani mtaani kuna maneno sana juu ya jambo hili.v
Chanzo;Tanzania Daima

MSISHANGAE, CCM IMEGEUKA KUWA MNARA WA BABELI!

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 
Sasa ni dhahiri kwamba mwelekeo wa nchi yetu umetufikisha mahali pabaya. Haya tumeyasema, tumeyaandika, wengine tumeyahubiri, lakini serikali yetu tukufu ya CCM haisikiii.
Mara nyingi kwa watu waliosema hayo, wameonekana ni ‘maadui nambari wani.’ Ni kitu cha kusikitisha kwa taifa kama hili ambalo ni changa lakini lenye kubarikiwa na Mwenyezi Mungu.
Waswahili husema, penye miti hakuna wajenzi.’ Siasa za nchi yetu zilianza vyema na Baba wa Taifa, Mwalimu Julius Nyerere ambaye anaweza kufananishwa kama ‘Musa’ aliyewatoa Waisraeli utumwani.
Kazi ya kuleta ukombozi ni kazi ngumu kwa kiongozi na wanaowangoza, kwani inahitaji ubunifu, upendo, uzalendo, heshima, utu na uvumilifu mkubwa.
Mwalimu Nyerere alijenga taifa lenye umoja, heshima, undugu, usawa, upendo, amani na haki, chini ya siasa za ‘Ujamaa na Kujitegemea’ kama dira yake ikaimarishwa na Azimio la Arusha la 1967.
Mwalimu alijitahidi kufuta utemi na kuwaunganisha Watanzania wakazungumzia lugha moja ya kindugu. Hata hivyo, baada ya Mwalimu Nyerere kufariki dunia, viongozi waliofuata walianza kuachana na misingi mizuri aliyoiasisi. Leo, nchi yetu imegawanyika vipande chini ya Serikali ya CCM. Chini ya Mwalimu Nyerere, CCM ailikuwa na umoja, dira, sera nzuri, ilikuwa na upendo.
Ile ya Nyerere ilipendeza, kupendwa na Watanzania karibu wote. Lakini, CCM ya leo inayounda Serikali ya Tanzania imegeuka na kuwa kama ‘mnara wa Babeli’ (Mwanzo 11:19). Kwa nini naifananisha CCM ya leo na mnara huo maarufu? Ni kwa sababu ya hali halisi ya siasa katika nchi yetu. Waisraeli walipofika katika nchi ya Shinar walifyatua matofali na kujijengea mji na mnara ili kuichungulia mbingu kwa majivuno ya kujiona wao sasa ni sawa na Mungu.
Kisha, wakasema ngoja tujitengenezee jina kwa ajili yetu. Lakini, Mungu aliposhuka kutoka mbinguni alipoona jinsi walivyojaa majivuno, kiburi, dharau, ulevi wa madaraka akawasambaratisha kwa kuwachanganya wasisikilizane tena. ( Mwanzo 11:1-9). Na huo ndiyo ukawa mwisho wao.
CCM ya sasa imekuwa kama mnara wa Babeli, hakuna umoja, upendo, amani, kuamini, heshima, dira, sera za kujali wanyonge, kuwatumikia wananchi.
Ndani yake, kuna kejeli, vitisho, kiburi na ubabe. Kwa nini tuifananishe na Mnara wa Babeli? Askofu Mkuu Zakaria Kakobe wa Kanisa la Full Gospel Bible Fellowship alishatoa utabiri kama huo huo, kwamba CCM itasambaratika, na je, nini kinaendelea kutokea hadi leo hii na hasa ukitazama kinachojiri kwenye Bunge Maalumu la Katiba huko Dodoma? CCM inazidi kujikaanga kwa kupanga kila aina ya mizengwe, hila, fitina, unyanyasaji kwa raia na wapinzani kwa kutumia vyombo vyake.
Je, hii si alama ya kusambaratisha kama mnara wa Babeli? Mungu wetu ni Mungu wa haki, mtu mwenye fitina na chuki, hatafika mbali, maandiko yanasema.
Kuendelea kujidanganya kwamba CCM inapendwa na inakubaliwa na Watanzania wengi ni kuonyesha upofu wa hali ya juu, ulevi wa madaraka. Matokeo yake ni kulazimisha, kitu ambacho ni alama wazi ya kushindwa kuendesha nchi kwa kufuata sheria, kanuni na katiba
Bahati mbaya kuna wana- CCM na viongozi wa serikali ambao kwa makosa ya fikra, kiburi na utamu wa madaraka bado wanajidanganya na kuamini kuwa chama chao kitadumu milele. Hawa pamoja na mashabiki wao wapenda madaraka na mafisadi wamejiaminisha katika upotofu wao kuwa chama hiki kitatawala milele, kitadumu milele na kitaendelea kuwa kama kilivyo sasa milele na milele!
Hawa ni wale wanaotakiwa kuombewa kwani wana ‘pepo la ulevi wa madaraka’ ambao ni ugonjwa mbaya.
Niseme tu kwamba CCM ni tunda la fikra na kazi ya binadamu; ni chombo kilichoundwa na wanadamu, kinaongozwa na binadamu.
Kwa hiyo, CCM ni chombo kinachoweza kuharibika, kuvunjika, na mwishowe kinaweza kufa. Vyama vingi vikongwe Afrika kama vile, Kenya (KANU), Malawi (MCP), Zambia (UNIP) na kadhalika vilikufa.
Busara za kibinadamu zinatuambia,‘ kila kitu kina mwanzo na mwisho’. Hivyo, CCM lazima itafika mwisho kama siyo leo ni kesho, na kama siyo kesho, keshokutwa, hii ni kawaida.
Watu wengine wanapokaribia kufa huhangaika na kutapatapa wakijaribu kujiuliza kwa nini mimi, hutafuta mchawi wao ni nani?
Leo, CCM inahangaika kutafuta mchawi wake ni nani na inapoteza muda mwingi kushughulika na wapinzani, kuwadhibiti badala ya kujenga sera za kuwakwamua Watanzania kutoka katika lindi la umaskini. Mchawi wa CCM ni wao wenyewe lazima ifike mahali wajitafiti. Nchi inadai mabadiliko, je wapo tayari kuyaongoza mabadiliko hayo kwa usalama na umakini?
Saikolojia ya magonjwa ya akili inatufundisha kwamba dawa pekee ya kupona magonjwa hayo kama ulevi wa dawa na pombe ni kujikubali kwamba una tatizo, la sivyo utaendelea kusteseka.
Hivyo, ninaposikia mtu anasema kwamba hakuna ufisadi ndani ya CCM anashangaza. Nikimsikia anayesema ‘CCM ni safi’, naendelea kumshangaa zaidi, nikisema mwenzetu anazungumzia CCM gani ya Mwalimu Nyerere au hii ya leo? Pia, ninapowasikia wapiga propaganda wa CCM wamekazana kuitetea kuwa ni chama safi na kina ‘mafisadi wanne’, ninafumba macho yangu na kujiuliza ‘hivi ni kweli’ au ni porojo?
Au hii ni alama ya kukata tamaa na alama wazi ya kugeuka mnara wa Babeli na ulevi wa madaraka. Matukio ya ajabu tunayoyasikia sasa na kuyashuhudia hivi sasa ndani ya CCM ni alama wazi kwamba chama hiki kikongwe barani Afrika hakika CCM iko matatani na hakuna mtu wa kuiokoa. Haiokoleki kwa sababu imegeuka na kuwa kama mnara wa Babel
 Chanzo;Mwananchi
 
Supported by Tone Multimedia Company Limited
Copyright © 2012. Tanga Yetu - All Rights Reserved
Designed by Fredy Tony Njeje
Proudly powered by Blogs za Mikoa