VIJANA WILAYANI LUSHOTO WAPEWA SOMO NA MWENYEKITI WA UMOJA WA VIJANA(UVCCM)

MWENYEKITI wa Jumuiya ya Umoja wa Vijana Mkoa wa Tanga,Abdi Makange amewataka vijana wilayani Lushoto kujituma na kufikiria namna ya kubuni ajira mbadala ikiwemo kujikita katika masuala ya ujasiriamali ili kuweza kuendesha maisha yao badala ya kuendelea kutegemea ajira za kuajiriwa.

Kauli hiyo aliitoa jana wakati akizungumza na wajumbe wa kamati ya utekelezaji ya umoja huo wilaya ya Lushoto(UVCCM)wakati wa ziara yake ya kwanza ya kukagua na kuangalia uhai wa umoja huo pamoja na kufanya mikutano ya hadhara inayofanyika mkoa mzima wa Tanga.

Makange alisema katika dhama hizi za utandawazi vijana wanapaswa kuwa mstari wa mbele katika kubuni miradi mbalimbali ikiwemo kufanya biashara na kufungua makampuni ambayo yataweza kutimiza ndoto zao katika maisha.

  “Vijana wengi huathiriwa na ajira hasa wale wa vyuoni nataka kuwaeleza kuwa lazima mjitambue sasa kwa kuelekeza nguvu zenu katika ajira za kujiari wenyewe kwa kuanzisha makampuni ambayo yatawawezesha  kusukuma gurudumu la maendeleo yenu “Alisema Makange.

Aidha aliwaataka vijana kuangalia changamoto waliokuwa nazo ili kuweza kukabiliana nazo na kuzipatia ufumbuzi lengo likiwa kuhakikisha umoja huo unaimarika na kuwataka vijana walipo vyuoni kujitahidi kuingiza wanachama wapya katika maeneo yao.

Mwenyekiti huyo aliwataka vijana hao kuwa mstari wa mbele kukitetea chama hicho na kujenga mshikamano na kuachana na makundi yasiyokuwa na tija lengo likiwa ni kuimarisha umoja huo mkoani hapa.

Na Oscar Assenga, Lushoto. 

Chanzo;tanga raha blog